28.12.2009

Öryggiseftirlit hefur verið hert á fjölmörgum flugvöllum í kjölfar þess að tilraun var gerð sl. föstudagskvöld til að sprengja í lofti upp bandaríska farþegaflugvél. Í Leifsstöð verður eftirlit hert með flugi til Bandaríkjanna og geta aðgerðirnar leitt til einhverra tafa.

Friðþór Eydal, upplýsingafulltrúi Leifsstöðvar, hvetur farþega sem eiga bókað flug til Bandaríkjanna til að vera fyrr á ferðinni en ella sökum aðgerðanna. Meðal annars verður leitað á farþegum og handfarangur skoðaður mjög vandlega.

Bandaríska flugöryggiseftirlitið (TCA) fór fram á að eftirlitið yrði hert og hefur verið farið að vilja þess á fjölmörgum flugvöllum, sérstaklega í Evrópu.

Fréttavefur Morgunblaðsins greindi frá þessu.

28.12.2009

Atli Steinn Guðmundsson skrifar:

Óeinkennisklæddum lögreglumönnum í farþegaflugi verður fjölgað í kjölfar atburðanna sem áttu sér stað í flugi milli Amsterdam og Detroit á jóladag.

Janet Napolitano hjá heimavarnastofnun Bandaríkjanna segir ekkert benda til þess að tilraun nígerísks verkfræðinema til að sprengja farþegaflugvél í loft upp í flugi frá Amsterdam til Detroit hafi verið hluti af alþjóðlegu hryðjuverkasamsæri. Þrátt fyrir það hefur óeinkennisklæddum og vopnuðum lögreglumönnum í bandarískum farþegaflugvélum verið fjölgað síðan atvikið átti sér stað en það hefur CNN-fréttastofan eftir öðrum og ónafngreindum heimildamanni hjá heimavarnastofnuninni.

Verkfræðingurinn verðandi hafði ekki annað upp úr krafsinu en að kveikja í buxunum sínum áður en skelfingu lostin áhöfn flugvélarinnar yfirbugaði hann með aðstoð annarra farþega en bandarísk flugmálayfirvöld líta málið engu að síður mjög alvarlegum augum eins og flugfarþegar um gervalla Evrópu fengu að reyna á eigin skinni þegar þeim var gert að mæta allt að fjórum klukkustundum fyrr en ella vegna herts öryggiseftirlits og sprengjuleitar og þykir mörgum borið í bakkafullan lækinn eftir allar þær tafir sem samgöngur í Evrópu hafa mátt sæta vegna fannfergis fyrir jólin...

28.12.2009

Framkvæmdastjórn japanska flugfélagsins Japan Airlines (JAL) íhugar nú alla þá möguleika sem félagið hefur og er einn þeirra að setja félagið í þrot. JAL fékk nýverið greiðslustöðvun en japanska ríkið þarf væntanlega að bjarga félaginu og ef af því verður þá er það í fjórða skiptið síðan árið 2001. Talsmaður JAL segir að allt verði reynt til þess að forða félaginu frá gjaldþroti.

Meðal aðgerða sem gripið verður til svo hægt verði að rétta rekstur JAL við, er að segja upp þúsundum starfsmanna og fækka áætlunarleiðum verulega.

JAL hefur fengið boð frá bæði American Airlines og Delta Air Lines um fjárhagslegan stuðning gegn því að þau fái minnihlutaeign í JAL. Þykir til mikils að vinna að komast að á Asíumarkaði þar sem JAL er með sterka stöðu.

Þetta kom fram á viðskiptavef Morgunblaðsins í dag.