28.12.2009

Maðurinn sem reyndi á jóladag að sprengja þotu á leið til Detroit í Bandaríkjunum í loft upp hefur verið ákærður fyrir verknaðinn.

Hinn 23 ára gamli Umar Farouk Abdulmutallab frá Nígeríu var yfirbugaður af farþegum vélarinnar er þeir áttuðu sig á fyrirætlan hans. Þotan var á leið frá Amsterdam til Detroit.

Bandaríska dómsmálaráðuneytið segir að sprengjuefni hafi fundist um borð í vélinni. Tilræðismaðurinn þarf nú að mæta fyrir rétt en þar sem hann slasaðist í átökum við farþega mun fyrsta stig réttarhaldanna fara fram á sjúkrahúsinu þar sem hann fær aðhlynningu.

Maðurinn flaug frá Laos til Amsterdam og þaðan til Detroit. Verið er að rannsaka hvernig hann komst með sprengjuefnin um borð í vélina. Sjálfur sagði hann lögreglunni að hann hefði tengsl við hryðjuverkasamtökin al-Qaeda og að hann hefði fengið sprengiefnið í Yemen. Þar voru efnin saumuð inn í nærfötin hans.

Fréttavefur Morgunblaðsins greindi frá þessu.

28.12.2009

Atli Steinn Guðmundsson skrifar:

Óeinkennisklæddum lögreglumönnum í farþegaflugi verður fjölgað í kjölfar atburðanna sem áttu sér stað í flugi milli Amsterdam og Detroit á jóladag.

Janet Napolitano hjá heimavarnastofnun Bandaríkjanna segir ekkert benda til þess að tilraun nígerísks verkfræðinema til að sprengja farþegaflugvél í loft upp í flugi frá Amsterdam til Detroit hafi verið hluti af alþjóðlegu hryðjuverkasamsæri. Þrátt fyrir það hefur óeinkennisklæddum og vopnuðum lögreglumönnum í bandarískum farþegaflugvélum verið fjölgað síðan atvikið átti sér stað en það hefur CNN-fréttastofan eftir öðrum og ónafngreindum heimildamanni hjá heimavarnastofnuninni.

Verkfræðingurinn verðandi hafði ekki annað upp úr krafsinu en að kveikja í buxunum sínum áður en skelfingu lostin áhöfn flugvélarinnar yfirbugaði hann með aðstoð annarra farþega en bandarísk flugmálayfirvöld líta málið engu að síður mjög alvarlegum augum eins og flugfarþegar um gervalla Evrópu fengu að reyna á eigin skinni þegar þeim var gert að mæta allt að fjórum klukkustundum fyrr en ella vegna herts öryggiseftirlits og sprengjuleitar og þykir mörgum borið í bakkafullan lækinn eftir allar þær tafir sem samgöngur í Evrópu hafa mátt sæta vegna fannfergis fyrir jólin...

28.12.2009

Framkvæmdastjórn japanska flugfélagsins Japan Airlines (JAL) íhugar nú alla þá möguleika sem félagið hefur og er einn þeirra að setja félagið í þrot. JAL fékk nýverið greiðslustöðvun en japanska ríkið þarf væntanlega að bjarga félaginu og ef af því verður þá er það í fjórða skiptið síðan árið 2001. Talsmaður JAL segir að allt verði reynt til þess að forða félaginu frá gjaldþroti.

Meðal aðgerða sem gripið verður til svo hægt verði að rétta rekstur JAL við, er að segja upp þúsundum starfsmanna og fækka áætlunarleiðum verulega.

JAL hefur fengið boð frá bæði American Airlines og Delta Air Lines um fjárhagslegan stuðning gegn því að þau fái minnihlutaeign í JAL. Þykir til mikils að vinna að komast að á Asíumarkaði þar sem JAL er með sterka stöðu.

Þetta kom fram á viðskiptavef Morgunblaðsins í dag.