24.06.2008

Afbókanir og færri skammtímabókanir hjá innlendum fyrirtækjum í ferðaþjónustu veldur áhyggjum um afkomuna á næsta hausti. Fyrirhugaðar vinnustöðvanir flugumferðastjóra, gengissveiflur og hátt olíuverð valda einnig áhyggjum af þrengingum.

Framkvæmdastjóri Samtaka ferðaþjónustunnar, Erna Hauksdóttir sagði í viðtali í kvöldfréttum RÚV að núþegar sé talsvert um afbókanir á ferðum og gistingu í sumar og minna um ferðamenn sem ekki hafi bókað langt fram í tímann.

„Menn hafa mjög miklar áhyggjur af haustinu. Bæði bókanalega séð og svo hafa flugfélögin boðað að þau muni draga úr flugi og það hefur áhrif á ferðaþjónustuna," sagði Erna.

Þetta kom fram á fréttavef Morgunblaðsins í dag.

24.06.2008

Margar flugvélar sem gert hafa garðinn frægan hérlendis voru til sýnis á Akureyrarflugvelli um helgina, þar sem Flugsafn Íslands efndi til hátíðar. Meðal þess sem gat að líta var þyrlan TF-SIF, sem bjargað hefur ótal mannslífum, en Landhelgisgæslan afhenti safninu hana til varðveislu.

Flugsafnið, sem er með aðsetur á Akureyrarflugvelli, var stofnað fyrir tæpum tíu árum. Þar eru varðveittir og sýndir munir sem tengjast flugi á Íslandi, sögu þess og þróun.

Horfa á myndskeið af vef Morgunblaðsins.

Þetta kom fram á vef Morgunblaðsins í dag.

24.06.2008

Ferðamálasamtök Íslands segja að yfirvofandi verkföll flugumferðarstjóra, sem hefjast á föstudag, séu aðför að ferðaþjónustunni í landinu. Þá segja þau sorglegt að fámenn stétt hálaunafólks skuli ógna rekstraraðilum á Íslandi á þennan hátt.

Eins og fram hefur komið boða flugumferðarstjórar 20 fjögurra tíma vinnustöðvanir á tímabilinu 27. júní til 20. júlí til þess að knýja á um nýjan kjarasamning. Við þessu hafa fjölmargir aðilar brugðist, nú síðast Ferðamálasamtök Íslands.

Í tilkynningu frá þeim segir að á undanförnum árum hafi fjöldi frumkvöðla byggt upp margvíslega ferðaþjónustu um land allt, gistiaðstöðu, veitingasölu og fjölbreytta afþreyingu með ærnum tilkostnaði og lánum. Þessi starfsemi séu nú í uppnámi vegna verkfallsboðunar flugumferðarstjóra...